സിബി മലയിലിന് പിറന്നാൾ ആശംസകൾ: ഫെഫ്ക ഡയറക്ടേഴ്സ് യൂണിയൻ

മലയാളികൾ എന്നും ഓർത്തുവെക്കുന്ന ഹൃദയസ്പര്‍ശിയായ നിരവധി സിനിമകള്‍ സമ്മാനിച്ച സംവിധായകനാണ് സിബി മലയില്‍. ദേശീയ, സംസ്ഥാന തലത്തിൽ ശ്രദ്ധേയമായ സദയം , കിരീടം, തനിയാവര്‍ത്തനം, കാണാക്കിനാവ് , ഹിസ് ഹൈനസ് അബ്ദുള്ള, ആകാശദൂത്, ഓഗസ്റ്റ് 1, മുത്താരംകുന്ന് പി ഒ, സമ്മര്‍ ഇന്‍ ബെത്‌ലഹേം, ഭരതം തുടങ്ങി 40ലധികം ചിത്രങ്ങള്‍ സംവിധാനം ചെയ്തിട്ടുണ്ട്.

ലോഹിതദാസ്‌ , എം ടി , രഞ്ജിത്ത് , ഡെന്നീസ്‌ ജോസഫ് , ടി എ റസാഖ് , ശ്രീനിവാസൻ , എസ് എൻ സ്വാമി തുടങ്ങിയവരുടെ തിരക്കഥയിൽ അദ്ദേഹം ഒരുക്കിയ സിനിമകൾ മലയാള സിനിമയുടെ ഭാഗ്യ കാലത്തിന്റെ അടയാളങ്ങളായി കണക്കാക്കപ്പെടുന്നു .

മലയാള ചലച്ചിത്ര ഗാനശാഖക്ക് മികച്ച ഗാനങ്ങൾ ഇദ്ദേഹത്തിന്റെ ചിത്രങ്ങൾ സമ്മാനിച്ചു .
ഗാനചിത്രീകരണങ്ങളിൽ തിരക്കഥയുടെ അടിസ്ഥാനമായി വർത്തിച്ച ഭാവ താളങ്ങളെക്കൂടി പരിഗണിച്ചു . കേരളീയ ജീവിത പരിസരം യാഥാർഥ്യ ബോധത്തോടെ സമന്വയിപ്പിച്ചു . സംഘട്ടന ദൃശ്യങ്ങളിൽ കഥാപാത്രങ്ങളുടെ മാനസിക സഞ്ചാരങ്ങൾക്ക് കൂടി പ്രാധാന്യം നൽകി . ജനപ്രിയ സിനിമ സങ്കൽപ്പങ്ങളെ പൊളിച്ചെഴുതുക മാത്രമല്ല വമ്പിച്ച വാണിജ്യ വിജയം തന്റെ ചിത്രങ്ങൾക്ക് സമ്മാനിക്കുകയും ചെയ്തു , മലയാള കുടുംബ പ്രേക്ഷകരുടെ ഈ പ്രിയ സംവിധായകൻ .

ഒട്ടേറെ പുതുതലമുറ ചലച്ചിത്ര പ്രവർത്തകർക്ക് സിനിമയിലേക്ക് വരാൻ പ്രചോദനമായത് സിബി മലയിൽ ചിത്രങ്ങളാണെന്ന് പലരും അഭിമുഖങ്ങളിൽ വെളിപ്പെടുത്തിയിട്ടുണ്ട് . അക്കാദമിക് അംഗീകാരങ്ങളും പ്രദർശനവിജയവും കരസ്ഥമാക്കിയ തമിഴ് സംവിധായകൻ വെട്രിമാരൻ അദ്ദേഹത്തിന്റെ സിനിമകളിലെ ഫാമിലി റെഫറൻസ് സിബി മലയിൽ ചിത്രങ്ങളാണെന്ന് IFFK വേദിയിൽ പറഞ്ഞത് ഏറെ ശ്രദ്ധേയമായിരുന്നു .

1956 മേയ് 2നു് ആലപ്പുഴ മലയില്‍ വീട്ടില്‍ സിബി മലയില്‍ ജനിച്ചു.

അച്ഛന്‍ എം ജെ ജോസഫ്.
അമ്മ മേരി ജോസഫ്.
രണ്ട് സഹോദരിമാരും രണ്ട് സഹോദരന്മാരും ഉണ്ട് .

തത്തംപള്ളി സെന്റ് മൈക്കിള്‍സ് സ്ക്കൂള്‍, ആലപ്പുഴ ലിയോ തേര്‍ട്ടിന്ത്, ചങ്ങനാശ്ശേരി സെന്റ് ബര്‍ക്‌മെന്‍സ്, എസ് ഡി കോളേജ് ആലപ്പുഴ എന്നിവിടങ്ങളിലായി വിദ്യാഭ്യാസം പൂര്‍ത്തിയാക്കി. തുടര്‍ന്ന് നവോദയത്തില്‍ എം ബി പുന്നൂസ് ( അപ്പച്ചന്റെ ) സംവിധാന സഹായിയായി.
ജിജോ, പ്രീയദര്‍ശന്‍, ഫാസിൽ എന്നിവരുടെ സഹായിയായും പ്രവര്‍ത്തിച്ചിട്ടുണ്ട് .

ശ്രീനിവാസന്റെ തിരക്കഥയിൽ 1985 ൽ മുത്താരംകുന്നു് പി ഒ എന്ന ചിത്രം ഒരുക്കിക്കൊണ്ട് സ്വതന്ത്ര സംവിധായകനായി.
ദൂരെ ദൂരെ ഒരു കൂടു കൂട്ടാം, ആകാശദൂത് , സദയം എന്നീ ചിത്രങ്ങള്‍ക്ക് ദേശീയ അവാര്‍ഡ് കിട്ടി. ഭരതം, ദേവദൂതന്‍ എന്നീ ചിത്രങ്ങള്‍ക്കു് സംസ്ഥാന അവാര്‍ഡ് ലഭിച്ചു.

ഭാര്യ ബാല. മക്കള്‍ ജോ, സേബ.

ഇപ്പോൾ കേരള ചലച്ചിത്ര അക്കാദമി ഭരണ സമിതി അംഗമാണ് . മലയാള ചലച്ചിത്ര പ്രവർത്തകരുടെ ട്രേഡ് യൂണിയനായ ഫെഫ്കയുടെ പ്രസിഡന്റ് ആണ് .

മോഹന്‍ലാല്‍ എന്ന നടന്റെ അഭിനയ വൈഭവം ഏറ്റവും കൂടുതല്‍ ഒപ്പിയെടുത്തത് സിബി മലയിലിന്റെ ക്യാമറ കണ്ണുകളാണ് . കിരീടവും, ചെങ്കോലും, ഭരതവും, ദശരഥവുമൊക്കെ പ്രേക്ഷക മനസ്സിന്റെ വിങ്ങലായപ്പോള്‍ സിബി മലയിൽ – ലോഹിതദാസ് കൂട്ട്കെട്ട് മലയാള സിനിമക്ക് പുതിയ ഭാവുകത്വം സമ്മാനിച്ചു .
ഇന്ത്യൻ സിനിമ ഇനിയും അക്കാദമിക്ക് തലത്തിൽ ഏറെ പഠിക്കേണ്ടിയിരിക്കുന്ന ലോഹിതദാസ്‌ എന്ന അതുല്യ സ്‌ക്രീൻ റൈറ്ററെ സിനിമയിൽ അവതരിപ്പിച്ചതും സിബി മലയിൽ ആണ്.

 

—————————————-
സിബി മലയിലിന്റെ സിനിമകൾ

സൈഗാൾ പാടുകയാണ് (2015)
ഞങ്ങളൂടെ വീട്ടിലെ അതിഥികൾ (2014)
ഉന്നം (2012)
വയലിൻ (2011)
അപൂർവ്വരാഗം (2010)
ഫ്ലാഷ് (2007)
ആലീസ്‌ ഇൻ വണ്ടർലാൻഡ് (2005)
അമൃതം (2004)
കിസ്സാൻ (2004)
ജലോൽത്സവം (2004)
എന്റെ വീട് അപ്പൂന്റേം (2003)
ആയിരത്തിൽ ഒരുവൻ (2003)
ഇഷ്ടം (2001)
ദേവദൂതൻ (2000)
ഉസ്താദ്(1999)
സമ്മർ ഇൻ ബെത്ലഹേം (1998)
പ്രണയവർണങ്ങൾ (1997)
നീ വരുവോളം (1997)
കളിവീട് (1996)
കാണാക്കിനാവ് (1995)
സിന്ദൂരരേഖ (1995)
അക്ഷരം (1995)
സാഗരം സാക്ഷി (1994)
ചെങ്കോൽ (1993)
മായാമയൂരം (1993)
ആകാശദൂത് (1993)
വളയം (1992)
കമലദളം (1992)
സദയം (1992)
സാന്ത്വനം (1991)
ഭരതം (1991)
ധനം (1991)
പരമ്പര (1990)
മാലയോഗം (1990)
ഹിസ്‌ ഹൈനെസ്സ് അബ്ദുള്ള (1990)
ദശരഥം (1989)
കിരീടം (1989)
ഓഗസ്റ്റ്‌ 1 (1988)
വിചാരണ (1988)
എഴുതാപ്പുറങ്ങൾ (1987)
തനിയാവർത്തനം (1987)
രാരീരം (1986)
ദൂരെ ദൂരെ ഒരു കൂട് കൂട്ടാം (1986)
ചേക്കേറാൻ ഒരു ചില്ല (1986)
മുത്താരംകുന്ന് പി.ഒ. (1985)

Show More

Related Articles

Close
Close